الأربعاء، 3 ديسمبر، 2014

استمع الى نص المقدمة النارية ضد مبارك والسيسي التي أطاحت بعايدة سعودي من الاذاعة

حصلت "المصريون" على نص المقدمة النارية التي قالتها "عايدة سعودي" - المذيعة براديو هيتس التابع للإذاعة المصرية - عقب تبرئة مبارك والذي أدى للإطاحة بها من عملها .
وقالت "سعودي" في مقدمة برنامجها : بصراحة انا كنت قبل الحلقة مش عارفة أطلع اقول ايه ؟ مش عارفة اسمع مزيكا؟ ولا اقول كام حاجة؟ ولا اعمل نفسي مش من هنا؟ ولكن في الاخر احنا قناة ترفيهية بالدرجة الاولى وبنسمع مزيكا بالدرجة الاولى لكن دة لا ينفي اننا ممكن نقول كلمتين برضو بالدرجة الاولى .
وأضافت: طبعاً جملة لا تعليق على أحكام القضاء جملة كلنا عارفينها وحافظينها عن ظهر قلب وبنسمعها كتير وبنحترمها ومصدقين فيها لكن عندي شوية اسئلة : لما حد ينزل يحتفل بحكم براءة زي اللي حصل امبارح .. دة يعتبر تعليق على الحكم ولا مش تعليق؟ لو دة عادي يبقى كمان الحزن وإحساس الغبن والقهر من الحكم برضو عادي وحق للناس .
وأردفت: انا مش عايزة اعلق على الحكم ولا اعلق على تفاصيله ولا حيثياته بس من حقي كمواطن وكمذيعة - في إعلام الدولة - أني كمان أحس بالوجع والالم من حكم زي دة .. انا مش بعلق ولا بعترض بس حقي احس بالوجع للشباب اللي راح فداء أفكار حلوة "عيش وحرية وعدالة اجتماعية" ومن حقي احس بالقهر من الناس اللي بتحتفل بالبراء .. هما حرين بس من حقي اتضايق ان هما فرحانين في موت اصحابنا واخواتنا .
وتابعت : من حقي اتضايق من فرحتهم ببراءة اشخاص احنا عيشنا وشوفنا كل اللي حصل في عهدهم .. ودة مش تاريخ بنقراه في الكتب دي أيام احنا عيشناها وبنعيش تبعاتها لحد دلوقت من فقر جهل ومرض .
وقالت : قتل المتظاهرين دة مكنش في بلد تانية كان هنا وشوفناه قدام عينيا وكل الفيديوهات موجودة من دهس مواطنين وخرطوش في اصحابنا .. حق الناس تفرح وتحتفل بالبراءة لكن حقي احزن على ناس ماتت واتصابت قدام عنينيا بدون محاسبة الجانبي .. تزييف الوعي حاجة وتزييف ايام عيشناها حاجة تانية وخلوني اديكوا مثال مثلاً .. لو فيه تاجر مخدرات في قضية معينة خرج براءة لعدم ثبوت الادلة او اخطاء في الحرز دة مينفيش انه تاجر مخدرات ومينفيش انهم بهدلوا اجيال كتير واحنا عارفين دة وبالتالي دة مش هيحولهم لابرياء .
وأردفت : حق ناس تحتفل بالبراءة وحق ناس تتظاهر ضد الحكم دة .. بس مينفعش لما ناس تتظاهر ضد براءة لناس قتلوا اصحابهم .. يتفاجئوا أن نفس القتلة قتلوهم تاني .
ووجهت كلمة للنظام الحالي قائلة : حق الدولة تفض مظاهرات غير قانونية في نظام أتى بالتظاهر .. بس لو التظاهر ممنوع يبقى تتفض تظاهرات المؤيد زي المعارض .. الراقص زي الباكي .. احترم القضاء والقانون لكن مبحترمش أي اشخاص يخلوا ناس معينة فوق القضاء وفوق القانون او فوق الدولة.
إرسال تعليق