الاميرة فايزة
في عام 1953 استولى صلاح سالم على قصر احد الامراء فى جاردن سيتى علشان يبقى قريب من قصر الاميرة فايزة اخت الملك فاروق اللى كانت متجوزة من النبيل محمد على رؤوف و كان قصرها هو قصر الزهرية فى #الجزيرة و القصر ده اللى اتبنى برج #القاهرة فى حديقتها
صلاح سالم كان بيتحرك بالعربية الجيب بتاعته اللى بيتحرك بيها أعضاء مجلس قيادة الثورة لان كل واحد فيهم كان عنده واحدة زيها و كل يوم بالليل يروح قصر الاميرة فايزة و يتحرش بيها بكلمات حب امام زوجها
و كل يوم يروحلها و يضايقهم و يقولهم انا لازم افتش القصر و يفتش فى دولابها و يتعمد انه يطلع ملابسها الداخلية و يمسكهم امامها و امام جوزها و هى بعد ما يمشى تتصل باللواء محمد نجيب تشتكيله و طبعا اللواء محمد نجيب كان راس كرنبة فى مجلس قيادة الثورة فلما اتكلم مع صلاح سالم فوجئ انه بيقوله احنا بناخد حقنا منهم و انا هاتجوزها فقاله ازاى و هى متجوزة قاله هاخليه يطلقها
بعد كده صلاح سالم هدد جوزها و امره انه يسيب مصر لوحده و طلع قرار من مجلس قيادة الثورة بمنعها من السفر فساب مصر و مشى و ساب مراته ممنوعة من السفر و الشعب المصرى بقى بيقول عليه محمد على خروف بدل محمد على رؤوف
الموضوع انتشر جدا فى البلد و بقت الناس كلها بتتكلم عن الموضوع ده و عن مطاردة صلاح سالم عضو مجلس قيادة الثورة للاميرة فايزة
جمال عبد الناصر بدل ما يمنعه من مطاردتها قاله ابقى خد عربيتى الاوستن وانت رايحلها و بلاش العربية الجيب لان الناس كلها عارفة ان الجيب دى بيركبها ظباط القيادة !!!!
بدأت الاميرة فايزة تعرف ان القرار فى مجلس قيادة الثورة فى ايد البكباشى جمال عبد الناصر فاشتكيتله و اتصلت بيه و بعتت له تلغرافات و لكنه طبعا كان بيتجاهل الموضوع تماما
فجأة نشرت جريدة الاندبندت الانجليزية خبر عن الموضوع ده مكتوب فيه ان احد اعضاء قيادة الثورة بيضايق احدى شقيقات الملك و بيروح لها قصرها كل يوم بالليل
طبعا جمال عبد الناصر اول ما شاف الخبر أمر فورا بصدور قرار برفع منع السفر المفروض على الاميرة و خلاها سافرت على اول طيارة رايحة #استانبول
المصادر :
1 - كنت رئيسا لمصر - محمد نجيب
2 - 50 عاما فى قطار الصحافة - موسى صبرى
3 - حضرات الزملاء المحترمين - استحلوا الكرامة و الاعراض و الاموال - ناصر الدين النشاشيبى
4 - فاروق الاول و الاخير - هوانم القصر الملكى - اشرف مصطفى توفيق
الاميره فايزه فؤاد يوم زفافها على النبيل محمد على رؤوف
الاميره فايزه فؤاد يوم زفافها على النبيل محمد على رؤوف
صلاح سالم
جمال عبد الناصر و عبد الحكيم عامر و صلاح سالم
ليست هناك تعليقات:
إرسال تعليق